మలేరియా ప్రభావిత మారుమూల గ్రామాలైన రాళ్లపురం, ఉయ్యాలమడు గ్రామాల్లో చర్ల ప్రాథమిక ఆరోగ్య కేంద్రం ఆధ్వర్యంలో బుధవారం ఉచిత ఆరోగ్య శిబిరాలు నిర్వహించారు. వైద్యాధికారి డా. హారిక నేతృత్వంలో జరిగిన ఈ శిబిరాల్లో 46 మందికి వైద్య సేవలు అందించారు.
చర్ల ప్రాథమిక ఆరోగ్య కేంద్రం ఆధ్వర్యంలో మలేరియా ప్రభావిత మారుమూల గ్రామాలైన రాళ్లపురం, ఉయ్యాలమడు గ్రామాల్లో బుధవారం ఉచిత ఆరోగ్య శిబిరాలు నిర్వహించారు. వైద్యాధికారి డా. హారిక నేతృత్వంలో జరిగిన ఈ శిబిరాల్లో గ్రామస్తులకు ఆరోగ్య పరీక్షలు నిర్వహించి, అవసరమైన మందులు పంపిణీ చేశారు. మొత్తం 46 మంది వైద్య సేవలు పొందినట్లు వైద్య సిబ్బంది తెలిపారు.
వర్షాకాలంలో మలేరియా, డెంగీ, చికున్గున్యా వంటి దోమల ద్వారా వ్యాపించే వ్యాధుల పట్ల ప్రజలు అప్రమత్తంగా ఉండాలని డా. హారిక సూచించారు. ఇంటి పరిసరాల్లో నీరు నిల్వ ఉండకుండా చూసుకోవాలని, తాగునీటిని తప్పనిసరిగా మరిగించి, చల్లార్చిన తర్వాతే వినియోగించాలని తెలిపారు. ఆహార పదార్థాలను మూతపెట్టి ఉంచడంతో పాటు వేడి ఆహారాన్ని తీసుకోవాలని సూచించారు.
చిన్నారుల్లో అలర్జీ సమస్యలు ఎక్కువగా కనిపిస్తున్నాయని, రోజుకు రెండు పూటలా వేడి చేసి చల్లార్చిన నీటితో స్నానం చేయించాలని, వాగులు, చెరువుల్లోని కొత్త నీటిలో బ్యాక్టీరియా ఉండే అవకాశం ఉన్నందున అక్కడ స్నానం చేయించవద్దని తల్లిదండ్రులకు సూచించారు. ఈ కార్యక్రమంలో హెల్త్ సూపర్వైజర్ రాంప్రసాద్, హెల్త్ ప్రొవైడర్ తులసి, హెల్త్ అసిస్టెంట్లు ధర్మారావు, స్వరూప, ఆశ కార్యకర్తలు భద్రమ్మ, రంగమ్మ పాల్గొన్నారు.
