కార్పొరేట్ విద్యా సంస్థల దోపిడీపై ఎమ్మెల్సీ కుడుపూడి ఆగ్రహం; తల్లిదండ్రులకు అండగా ఉంటామని హామీ

డాక్టర్ బి.ఆర్ అంబేద్కర్ కోనసీమ జిల్లాలో ప్రైవేటు కార్పొరేట్ స్కూళ్లు విద్యాహక్కు చట్టాన్ని పూర్తిగా ఉల్లంఘిస్తున్నాయని ఎమ్మెల్సీ కుడుపూడి సూర్యనారాయణరావు ఆరోపించారు. సోమవారం జిల్లా కలెక్టర్ కార్యాలయంలో కార్పొరేట్ స్కూళ్ల ఫీజుల దోపిడీపై వినతిపత్రం అందించిన అనంతరం ఆయన మీడియాతో మాట్లాడుతూ, రాజ్యాంగ నిర్మాత డా. బాబా సాహెబ్ అంబేద్కర్ ఆశయాలకు విరుద్ధంగా విద్య, వైద్యం వ్యాపారంగా మారిందని విమర్శించారు.

ప్రస్తుత ప్రభుత్వాలు విద్యా వ్యవస్థను కొద్దిమంది చేతుల్లోకి వెళ్లేలా చేస్తున్నాయని, ముఖ్యంగా ఆంధ్రప్రదేశ్లో నారాయణ, చైతన్య, ఆదిత్య వంటి కళాశాలలు ప్రజాస్వామ్య వ్యతిరేకుల చేతుల్లో ఉన్నాయని ఎమ్మెల్సీ పేర్కొన్నారు. ఆర్థికంగా వెనుకబడిన వర్గాల పిల్లలకు విద్య అందకుండా చేసే కుట్ర జరుగుతోందని, దీనిని ప్రజాస్వామికవాదులందరూ అడ్డుకోవాలని ఆయన పిలుపునిచ్చారు.

కార్పొరేట్ విద్యా సంస్థలు పుస్తకాలు, హాస్టల్ ఫీజులు, బస్సులు, యూనిఫారాలు, బూట్లు వంటి వాటి పేరుతో తల్లిదండ్రులను లక్షల రూపాయలు దోచుకుంటున్నాయని, దీనిని ప్రభుత్వం అడ్డుకోలేకపోతుందని ఎమ్మెల్సీ తెలిపారు. ఈ దోపిడీకి వ్యతిరేకంగా తల్లిదండ్రులే తిరుగుబాటు చేయాలని ఆయన సూచించారు. తల్లిదండ్రులు తమ వద్ద దోపిడీ చేసిన స్లిప్పులను పోస్ట్ కార్డుపై రాసి పంపిస్తే, వాటిని ఏపీ హయ్యర్ ఎడ్యుకేషన్ రెగ్యులటరీ మానిటరింగ్ కమిషన్‌కు పంపి, ఫీజులను తిరిగి ఇప్పించేందుకు వంద శాతం కృషి చేస్తామని ఎమ్మెల్సీ సూర్యనారాయణరావు హామీ ఇచ్చారు.

అన్యాయంగా వసూలు చేసిన ఫీజులను వెనక్కి ఇప్పించడానికి అన్ని విధాలుగా కృషి చేస్తామని ఎమ్మెల్సీ తెలియజేశారు. తల్లిదండ్రులు తమ వద్ద జరిగిన దోపిడీ వివరాలను తెలియజేయాలని ఆయన కోరారు.